حكايات الأبرار

                                                                                     صياغة ورواية الفنان المسرحي بلقاسم بلحاج علي

        صحة شريبتكم

           … يا سادة يا كرام … مني عليكم السلام … باسم الله نبدا وننهي بالصلاة والسلام على سيدنا محمد عليه أفضل صلاة  وأزكى سلام …

              نحكو اليوم على حكايات الأبرار والصالحين . الحكاية لولى نتعرفوا فيها على فوائد الصلاة على رسول الله … ألف صلاة ولا تزيه … حكى واحد من الأئمة في سابق الزمان قال كنت في الحج وشفت واحد من الحجاج في الحرم ، في الطواف ، في عرفات ، في منى في المناسك بكلها لا يوقف ولا يقعد ولا يتحرك حركة إلا بالصلاة على النبي صلى الله عليه وسلم … فحبيت ننصحه مثله : ياخويا ما فيها باس تصلي على رسول الله لكن موش هكا  في كل حركة في كل وقفة وفي كل قعدة … ثمة أشياء أخرى  تعملها ثم التلبية التهليل ، الدعاء ، ولكل مقام مقال … جاوبني بغلظة : آش يهمك …؟ نعرف آش نعمل ؟ ؟؟؟ إيه نصلي عليه ونزيد نصلي في ترحالي وحلي … ومقامي وسفري … ونهاري وليلي … في كل مكان في كل زمان صلاتي عليه هي عبادتي وصلاتي وحجي وسعادتي … وقد ما نعمل ما نرجعلاش … عندك الحق … ما تعرفش اللي عمله معايا … بصراحة … عملة معايا ماننسهاشي طول حياتي اسمع حكايتي … باش ترتاح وثمش ما تعذرني وتقول معاي اللهم صل وسلم عليك يارسول الله :

توا سنين خرجت أنا ووالدي للحج … وفي الطريق مرضلي مرض كبير وعجزت في معالجته … وخذا صاحب الأمانة أمانته … وجيت على راسه وقعدت نبكي وننحب على فراقه واللي زاد في ليعتي ومصيبتي إني بعد ما مات عريت على وجهه نلقى وجه  خنزير … ترعبت واندهشت للأمر وقريب روحي تطلع مني وقلت في نفسي ياريتني مت ولا ريت هالشيء وقعدت الليل الكل سهران وعيني ما تنام كانشي عقاب الليل خذتني عيني شوي … وبين يقظة ومنام ريت في منامي راجل نظيف وجهه كله نور لابس أبيض في أبيض تفوح منه رائحة عطر حلو ينعش طول عمري ما شميته ولهيبة ووقار كلمني وقالي  كيف حالك وحال الوالد ؟ … انبهرت بالبكاء ومالقيت مانشد في روحي وقتله والدي مات في الغربة وتبدل وجهه وجه خنزير . وأنا حاير كيف نعمل وكيف ندير كيفاش باش نظهر بيه قدام الناس … كيف يتكشفوا عليه اللي باش يغسلوه ويدفنوه وآش باش يقولوا عليه … باش تقعد الحكاية الحكاية طول عمري وبعده على لساناتهم … حشمة ووصمة عار باش تقعد في عقابي لولد الولد … وبعد ما واساني هاك الراجل الطيب بكلمات هبطت على قلبي كي الثلج مد يده ومسح بيه وجه الوالد وإذا بيه رجع لهيئة البشر كي عادته وأحسن … فرحني ما لقيت وين نديرها وقتله بعد ما شكرته يا خويا … مرحوم الوالدين آشكونك إنت اللي حن بيك المولى على وعلى والدي ؟ … قالي كيفاش ما عرفتنيش ؟ … أنا محمد رسول الله شفيع المؤمنين … شفيع الخلق يوم الشدة …

بوك يا ولدي الله يتقبله برحمته … كان مسرف ويعامل الناس بالربا ، ولكنه كان ديما مواظب على الصلاة على في كل ليلة مرة … وعلى هذاكا طلبتله الشفاعة من المولى … استجابلي وشفعلي فيه فقت لقيت المكان اللي آنا فيه بكله يفوح بهاك العطر والطيب اللي شميته في المنام …جريت لجهة الوالد وكشفت على وجهه نلقاه كالبدر منور … حمدت ربي وسجدت للمولى وتعالى سجود الشكر وخذيت عهد على روحي باش نواظب على الصلاة على رسول الله في كل أحوالي وما نكفش عليها لين نموت … هذي ياخويا حكايتي .. انشاء الله راك عذرتني وفهمتني وفهمت قيمة الصلاة على النبي صلى عليه وسلم ألف صلاة ولا تكفيه … قال الإمام الصالح وهكا ارتاح بالي … واكتشف حكاية هاك الراجل … ومن يومها واظبت على الصلاة على النبي كل ليلة خمسمائة مرة .

الحكاية الثانية من حكايات الأبرار هي حكاية ” يا كريم عهدك القديم “

يحكو على مرا كانت في الحج وفي لشواط السبعة وهي تطوف بالكعبة الشريفة تقول وتعبد … “يا كريم عهدك القديم ” ثم راجل كان يسمع فيها وما سمعهاش  لا تلبي لا تدعي لا تهلل وقفها وقاللها : ياولية موش كان دعيتي المولى سبحانه وتعالى باللي في خاطرك خير الدنيا والآخرة ليك ولمن تحبي راهو الدعاء يابنتي في هالبلايص الطاهرة مستجاب .

للنبي ادعي … كبري ـ صلي على النبي ـ سبحي …جاوباته المرا وإنت اشنهو اللي حرق شعيرك ليش تطفل وتدخل في حاجة ما تعنيكش قاللها وهو متحشم سمحيني يا بنتي قصدي طيب قصدت النصيحة … قاتله : سامحتك يا راجل طيب … وهاني باش نحكيلك حكايتي وحكاية الكلام اللي تقول وتعيد فيه وماكان ينطلق لساني كان بيه .

في يوم من ليام كنت مسافرة راكبة بابور فيه من البشر شيء كبير رجال ونساء كبير وصغير … خمسطاش يوم كاملة في البحر وفي يوم صادفتني عاصفة كبيرة كسرت البابور وغرقوا الناس اللي كانوا فيه الكل كان القليل … واني نلقى روحي على لوحة من ألواح البابور مكبشة فيها وليدي في حضني ونلقى معايا على هاك اللوحة راجل وصيف حالة رعب لا يوريها لمومن أربع ليالي وثلاثة أيام واحنا يغلب فينا الموج … شفنا الموت بعيوننا وإحنا في هاك الحالة مد الراجل إيده يتحسس في وبدا يراود في على روحي … مراودة خبيثة … نهيته وقتله ياراجل كيفاش تعصي ربنا وااحنا في هالحالة والموت إيهدد فينا في كل لحظة … أولى بيك راك تناجي في ربك وتستغفر لذنوبك وتتوسل للمولى باش ينجينا … قالي ما فيش وأصر وهددني يلوحني أنا وولدي في البحر … فكرت … قرصت وليدي قرصة قوية … بكى مسكين من شدة الوجيعة … قتله خليني نرضع وليدي وبعد اعمل بي آش تحب … خطفه مني ولوحه في البحر … عيطت وهزيت عيوني للسماء وصحت : يا كريمك وعدك القديم وفي الحين خرجت من البحر دابة عظيمة من هواش البحر وكلات هاك الراجل في فم واحد وريحتني منه وبقيت وحدي تلعب بي  المواج وتلوح في من بلاصة لبلاصة أربعة أيام آخرين وبعد لوحتني في جزيرة بعيدة فقت نلقى روحي لايذة بي الأشجار المثمرة من كل شيرة ووادي حذاي يجري هرهار بالماء الحلو كي العسل كليت لين شبعت وشربت  لين رويت وأنا على طول نقول ونعيد … ياكريم عهدك القديم يا ربي لك الحمد والشكر … الحمد لك … الشكر ليك وقعدت في هاك الجزيرة الخالية وحدي لا من يونسني في غربتي ولا من يسليني … في النهار تلقاني ندور بين الأشجار والوديان وإذا جاء الليل نتخمد نرقد فراشي التراب وغطاي السحاب.

نهار اللي سطاشن يوم بانت لي من بعيد باخرة عظيمة لأعلى بلاصة في الجزيرة وبدت تلوح بالغطاء وتصيح … وبدات هاك الباخرة تقرب بالشوي ولوحت مراسيها وهبطوا زوز رجال في زورق صغير واسرعو للشط باش ينجدوني … وركبوني معاهم في الزورق وتمو يجذفو لين وصلوا الباخرة طلعوني وواصلت الباخرة طريقها وجاو الركاب الكل وبداو يسألوا في على حكايتي … حكيتهالهم من لول للآخر … وكان معاهم الربان غاب لحظة وجاءو في حضنه وليد وقال لي شوفي هالوليد يكونشي ولدك … وأنا قريب نتجن من الفرحة خطفته نلقاه هو … حضنته ومديتله ثديي رضع لين شبع ونام وأنا نردد ونقول : الحمد لك يارب … الشكر لك يارب … ياكريم عهدك القديم … وعمت الفرحة سكان الباخرة الكل وقدمولي الماكلة واللبسة والخيرات الكل …وكان هذا أسعد يوم في حياتي … وحكالي الربان على قصة ولدي وكيفاش لقوه من عشرين يوم والا أكثر شوي على ظهر حوتة كبيرة وصلتهولهم بنفسها وكلمتهم بلسان فصيح وقالتلهم : ردوه لامه ويا ويلكم ليا ما ردتوه لامه “

وهكا يا خويا رجعت لبلادي مع وليدي لاباس علينا على أحسن حال … وهاك علاش نقعد طول عمري نردد ونقول ” يا كريم عهدك القديم “

استمع الراجل لحكايتها العجيبة وتأثر بيها برشة وسألها :  لكن ما عرفتش آش قصدك بيها هالكلمة : يا كريم عهدك القديم توا ياكريم فهمناها أما شنوة عهده القديم؟  … جاوبته على الفور الكريم كيما قلت طبعا هو الله أما عهده القديم معناها : ما هو الله كي خلق جميع الخلق قالوا له بصوت واحد انت مع من يارب ؟ قاللهم أنا مع المظلوم حتى ناخذله حقه . وصدق رسول الله وقت اللي قال : والله لوبغى جبل على جبل  لدك الله الباغي منهما . وسبحان الله ناصر المظلوم وصدق رسوله سيدنا محمد عليه ألف صلاة وسلام .

الحكاية الثالثة والأخيرة الليلة في حكايات الصالحين والأبرار حكاية .. اللي يبعد على مآكله الحرام يسعد في الدنيا والآخرة .

على راجل سافر وخرج من بلاده يلوج على خدمة … شهرين هو يلوج من بلاد لبلاد … ما حنش ربي … ما لقاش حتى خدمة قرر يرجع لبلاده ويقنع باللي كتب هوله ربي في صحبة أهله وأماليه بوه وأمه واخوته …

وفي الطريق وهو جيعان تاعب تعدى على جنان تفاح … قعد يرتاح تحت شجرة تفاح وهز عينه وهو جيعان عجباته كعبة تفاح … تلفت منا … تلفت منا … لا شاف لا عساس ولا ناس … جبد نح هالكعبة التفاح … كلا شطرها … يلقاها عسل الدنيا … غراته قبل ما يكملها وما دام ما يشوف فيه حد يزيد ينحي كعبات آخرين … لكنه قبل ما يمد ايده ينحي كعبات آخرين …  توقف ورجعله شاهد العقل وقال في نفسه : بإنه حق انحي التفاح وبأنه حق نحيت التفاحة لولة وكليت شطرها … موش حرام على؟ سيدنا الرسول محمد صلى الله عليه وسلم قال ” اي جسد يتغذى من الحرام وإلا ينبت من الحرام النار أولى بيه ” … وبدا يحاول باش يتقيأ هاك التفاحة اللي مرارت في حلقه … وصعب عليه القي … بدا ينادي بأعلى صوته على مولى الجنان وكي سمعه ينادي جاه وقاله آش بيك ياولدي تنادي آش تحب ؟ حكاله لحكاية وكيفاش غرابة نفسه الأمارة بالسوء تفاحة من جنانكم كلا شطره وهاهو الشطر لا خر مازال فيده … وإنت ياخولا أنا حبيت سامحتيني وإلا بيعولي بأي ثمن آنا قابل خوذ متاعك وحللي فيها …

قاله الراجل : يا خويا أنا ما نستي مولى المول … أنا خدام ولا عندي حق لا نعطيك ولا نبيعلك … قاله ووينه مولى الجنان قاله : ما هو ديني هنا … سيكن في المدينة على مسافة يوم كامل والحي لهنا كان كل نصف شهر …

شكر الراجل هاك الخدام على أمانته وصدقه وزاد ثبت منه في الاسم بالضبط والعنوان متاع مولى الجنان ودعه وقصد ربي على مولى الجنان سافر على بركة الله يطوي الصحاري والجبال والوديان والمسالك الصعبة من غير ما يهمه لا تعب ولا شقا غير يوصل لمولى الجنان باش …………في ماكلة شطر التفاح ويحللهو له كان بالبيع والا بالسماح … تجمر من هالعملة السيئة الي عملها … كيفاش لا وهو إلي عمره ثلاثين سنة ما عمر اشيء دخل لكرشه حتى قد راس الذبانة من الحرام .

وبعد سفر طويل ومشقة كبيرة وصل المدينة اللي يسكن فيها مول الجنان وسأل عليه واذا بيه أشهر من نار على علم معروف في كل المدينة … دلوه الناس على بيته … دق الباب خرجله قاله أشكونك اتفضل آ ش حاجتك ؟

قدمله روحه وحكالة حكايته وطلب منه العفو والسماح وكان حب ياخذ منه ثمن التفاحة قدما يقردمها هو … تغشش الراجل مولى الجنان وقاله : إنت اعتديت على جناني وكليت التفاحة لا شيرة لا مشورة وبعد جيتني وحطيتني قدام المر المقضي باش تجبرني يا نسامحك يا نبيعلك … يا سيدي لا مسامحك ولا بايعلك وإقلب وجهك  من قدامي سارق التفاح وسكر الباب  في وجهه … حس الراجل بالإهالنة والمذلة وبخيبة كبيرة … لكنه ما أيسسش وما ستسلمش … وبات الليل الكل قدام دار مولى الجنان في البرد والجوع والصبح صبح مولى الجنان خرج من بيته وهو ترمى عليه يبوس في إيديه ورجليه يترجى العفو والرحمة وهو يبكي ويقول ياسيدي سامحني وافي عني ولي حن عليه مولى الجنان وقاله نسامحك ونقبل عثرتك بشرك : قاله : إشرط ياخوي … آنا اللحم وإنت السكين … حل مولى الجنان حانوته اللي بجانب الدار ودخل هاك الراجل وقعدوا … قاله مولى الجنان تعرف اشنوه شرطي …  وقبل ما يكمل كلمه جابوه المسكين كل شروطك مقبولة لكن تقولي كركر الحجر نكركره لكان تقولي كنخدمك بلاش أشهر وإلا سنين نقبل وما نطالب منك كان تحللي في ماكلة التفاحة … راني عمري ما دخلت حرام لكرشي . قاله مولى الجنان شرطي الوحيد تقبل تتزوج بنتي الوحيدة … اندهش الراجل لها المفاجأة الغريبة اللي لا تجي على البال ولا على الخاطر … وبدا يسأل في روحه وين أني الفقيرالمحتحت من هالراجل الغني اللي رزقه ما يوفاش وكيفاش تتخرج الطفلة من هالقصر ونسكنها في بيتي الصغير والحقير … وجابه بعد شوي تفكير بارك الله يا سيدي على عواطفك النبيلة وثقتك الغالية في شخصي الحقير ولكن بصراحة راجل فقير زوالي لا قادر نعرس لا بنتك ولا بغيرها خليت أهلي في حالة ضنكة نهار يستقاتو وعشرة لا ويستنو في رجوعي بفارغ صبر على خاطر أنا العايل متاعهم الوحيد … قاله مولى الجنان شوف ياولدي … انت حاجتك انحللك في التفاحة تتزوج بنتي  … ما كان باش انخاصمك بين ايدين الله يوم القيامة وما نخبيش عليك بنتي هذي اللي ما عندي غيرها راهي عمياء ما تشوفش وبكوشة ما تتكلمش وطرشة ما تسمعش وزيد مقعدة لا تمشي لا تجي … اذ قبلت وتزوجتها نعفي عليك ونخليك فيحل من العملة اللي عملتها واذا رفضت من تو نقولك اقلب وجهك من قدامي وحسابك عند الخالق وحسابك عند الخالق بكى الراجل بحسرة وقاله قبلت … قبلت عذاب الدنيا ولا عذاب الآخرة … لكن أمهلني …خليني نرجع لهلي ونلم شوي فلوس ونجيب العايلة نخطبو ونتمموا العرس … أعطيني  فيدي شهر …قاله مولى الجنان وإنت وضامن حياتك وإلاحياتي هالشهر ؟ … إذا تضمنلي نمهلك حتى عام … مهمه الراجل … قاله مولى الجنان إسمع يا ولدي أنا باش نعطيك دار خاصة بيك وبمرتك وكل لوازم العرس علي وما مطالبك حتى بشيء لا في الدنيا ولا في الآخرة وبعد العرس بأيام إن كان تحب مرتك معاك وتمشي تزور أهلك ما عنديش مانع … قاله الراجل قلي هكة جي العدل والشهاد ونعرس اليوم قبل غدوة … وتم عقد الزواج وملات الدار الزغاريت وجاو الناس رجال ونساء يهنو بها الحدث السعيد وكلف مولى الجنان مجموعة من الشباب يهزو العريس للحمام ومد للعريس فيدة خمسة آلاف دينار وقاله أصرف  على روحك … إشترى كساوي جدد وكل ما تحتاج وإذا كلتها نزيدك …

 وتقام العرس أفراح وليلالي ملاح فرق تعزف في أحلى الألحان وأكل من كل أصناف والعباد تملا وتفرغ على الدار عرس ما صارلا ش مثيل في البلاد .

وبعد المغرب شيع أصدقاء العريس لدارعروسه بالذكر والتكبير والصلاة على النبي ودخلوه للدار وسكروا عليه باش يختلي بعروسه … يلقاها اعدة قاللها السلام عليكم … جاوباته بصوت رقيق دافي . عليك السلام ورحمة الله

يازوجي العزيز وكشفت على وجهها وإذا بيها تشوف بعينين يسحروا … شدها من إيديها وهو مبهور بزينها وبالمفاجأة اللي حصلت له ووقفها … وقفت ومشت بدلال وحشمة . فادا هي أجمل فتاة شافها في حياته قد واعتدال وبهاء وجمال ودلال … قاللها هوموش مصدق ياخي إنت العروس اللي قالولي عليها وإلا أخرى غلطوا فيها بوك اهو وصفك لي غير هالأوصاف قاتله أش قالك قاللها فقالي عمياء قاتله صحيح عمياء على كل محرم آنا ما أشوف كان ما أحل الله . أي واش قالك آخر ؟ قاللها قالي طرشة قاتله صحيح أنا طرشة وذني لا تسمع واشي ولا قاذف ولا شاتم ومن هالناحية طرشة .أي واش قالك زادة ؟ قاللها قالي بكماء خرساء … قتلي صحيح أنا بكماء على القيل والقال وكثرة السؤال … بكماء على الحديث في شيء ما يعنينينش . قالكش حاجة أخرى…. قاللها قالي إنت مشلولة لا تمشي  ولا تحركي رجليك … قاتله صحيح أنا ما نمشيش للأسواق وين الاختلاط بالرجال والنساء … رجلي ما تتحركشي حتى لمحل فيه شك وإلا ريبة والا ما هوشي موافق عليه والدي ربي إيخليهولي وإلا إنت يا راجلي ربي ينصرك وإيخليك لي .

وقتها عرف الراجل اللي في الأمر سر كبير واللي نسيبه كان يحدث فيه بالألغاز واللي عروسه هذيكة هي … وبات ليلته كأنه في جنة الخلد يعانق في واحدة من حورياتها وواتفق هو وزوجته على أنه أول مولود يجيبوه كانه ذكر يسموه محمد وكان أنثى ايسموها تفاحة .

وفي الصباح جاء نسيبه هو ومرته وجابولهم فطور الصباح وباصوه وهنوهم ودعولهم بالرفاه والبنين وربي يباركلهم في صغيراتهم اللي باش يجيبوهم ووان شاء الله يتربو في عزهم وهناهم .

وتكلم النسيب وقال للعريس : اسمع ياولدي عروسك هذه ما جبتش غيرها وقعدت انلوج على راجل صالح يخاف ربي وما ياكلش الحرام وكي توفرلي في شخصك الكريم أعطيتك مهو عيني ومنو توه كل ما نملك هو هبة ليك وأنت المتصرف الوحيد فيه في حياتي وبعد مماتي . برا تو جيب والديك وأخوتك يشاركوك هالسعادة والنعيم …

روهكا ياسادة يا مستمعين نختمو حكايتنا الليلة حكايات الصالحين والأبرا .